उभादांडा ग्रामपंचायतीच्या कार्यकारिणीची परुळे बाजार ग्रामपंचायतीला अभ्यास भेट

परुळे

        उभादांडा ग्रामपंचायत कार्यकारिणी, शेतकरी प्रतिनिधी, महिला बचत गट सदस्य व ग्रामपंचायत कर्मचारी यांच्या संयुक्त पथकाने परुळे बाजार ग्रामपंचायतीला नुकतीच अभ्यास भेट दिली. ग्रामविकासासाठी राबविण्यात येणाऱ्या विविध उपक्रमांची माहिती घेण्यासाठी ही भेट आयोजित करण्यात आली होती.यावेळी माजी सभापती जयप्रकाश चमणकर, सरपंच निलेश चमणकर, उपसरपंच, ग्रामपंचायत सदस्य, शेतकरी व ग्रामस्थ तसेच महिला बचत गट प्रतिनिधी उपस्थित होते. कोकण कला मंडळाच्या श्रीम. मांजरेकर यांचेही विशेष उपस्थिती लाभली. परुळे बाजार ग्रामपंचायतीत आगमन झाल्यानंतर प्रदीप प्रभू यांनी पाहुण्यांचे स्वागत केले.ग्रामपंचायत अधिकारी शरद शिंदे यांनी पथकाला ग्रामपंचायतीत राबविण्यात येणाऱ्या नाविन्यपूर्ण उपक्रमांची सविस्तर माहिती दिली. यामध्येकाथ्या युनिट,तालुका प्लॅस्टिक संकलन युनिट,वॉटर एटीएम,ग्रामपंचायतीची प्रशासकीय कार्यप्रणाली,सांडपाणी प्रक्रिया युनिट, तसेच सिंधुदुर्ग विमानतळाची पाहणी या उपक्रमांचा समावेश होता. पथकाने हे सर्व उपक्रम प्रत्यक्ष पाहून समाधान व्यक्त केले असून ग्रामपंचायतीने उभारलेली विकासात्मक कामे कौतुकास्पद असल्याचे मत व्यक्त केले.उभादांडा ग्रामपंचायतीच्या पथकाने परुळे बाजार येथे राबविण्यात येणाऱ्या उपक्रमांचा आदर्श घेऊन आपल्या ग्रामविकासासाठीही अशीच प्रगतीशील कार्यपद्धती राबविण्याचा मनोदय व्यक्त केला. ही अभ्यास भेट शैक्षणिक आणि प्रेरणादायी ठरल्याचे उपस्थितांनी नमूद केले.