सामाजिक बांधिलकी प्रतिष्ठानला 'पोलीस मित्र' म्हणून सन्मानित

सिंधुदुर्गनगरी

    जिथे गरज वाटते अशा प्रसंगामध्ये पोलिसांना नेहमीच मदत करणारे सामाजिक बांधिलकी प्रतिष्ठानचे कार्यकर्ते रवी जाधव, रुपा मुद्राळे, लक्ष्मण कदम व शिवम सावंत यांचा नुकताच "पोलीस मित्र" हा बहुमान देऊन सन्मानित करण्यात आला.सिंधुदुर्ग जिल्हा पोलीस परेड मैदानावर झेंडा दिवस साजरा करण्यात आला. याप्रसंगी शहीद पोलीस स्मृति स्तंभाच्या ठिकाणी वीरगती प्राप्त झालेल्या पोलिसांना मान्यवरांच्या हस्ते पुष्पहार अर्पण करून आदरांजली वाहण्यात आली. या कार्यक्रमाला सामाजिक बांधिलकी प्रतिष्ठानच्या कार्यकर्त्यांना निमंत्रित करून "पोलीस मित्र" हा बहुमान देऊन सन्मानित करण्यात आले.
   याप्रसंगी वीरगती प्राप्त झालेल्या पोलिसांना सामाजिक बांधिलकी प्रतिष्ठानकडून पुष्पहार अर्पण करून आदरांजली वाहण्यात आली.सावंतवाडी पोलीस स्टेशनचे पोलीस निरीक्षक अमोल चव्हाण व पोलीस अमित राऊळ यांनी सामाजिक बांधिलकीच्या कार्यकर्त्यांची "पोलीस मित्र" म्हणून शिफारस केली होती. याप्रसंगी जिल्हाधिकारी तृप्ती घोडमिसे यांनी सामाजिक बांधिलकी प्रतिष्ठानचे काम खूप चांगले व कौतुकास्पद आहे. त्यांच्याजवळ मोठी मॅनपावर आहे मी हे स्वतः अनुभवलेले आहे अशा पद्धतीने त्यांनी सामाजिक बांधिलकी प्रतिष्ठानच्या कार्याची प्रशंसा केली. यावेळी पोलीस अधीक्षक डॉ. मोहन दहीकर यांनी, सामाजिक बांधिलकी प्रतिष्ठानच्या कार्यकर्त्यांना तुमचे सामाजिक बांधिलकीचे कार्य पुढे नेण्यासाठी मी नक्कीच मदत करेन असे आश्वासन दिले.सामाजिक बांधिलकी प्रतिष्ठानच्या अशा या सातत्यपूर्ण सेवाभावी कार्याचे सर्वत्र कौतुक होत आहे.