वेंगुर्ला आगाराची मुंबई बससेवा पूर्ववत!......शिरोडा–बोरीवली एसटी ७ सप्टेंबरपासून धावणार

वेंगुर्ला

    
       वेंगुर्ला तालुक्यातील प्रवाशांसह मुंबई, बोरीवली व परिसरात वास्तव्यास असलेल्या चाकरमान्यांसाठी दिलासादायक बातमी आहे. वेंगुर्ला आगारातून बंद असलेली शिरोडा–बोरीवली एसटी बससेवा ७ सप्टेंबरपासून पुन्हा सुरू होणार असून, बोरीवली–शिरोडा परतीची फेरी ८ सप्टेंबरपासून सुरू होणार आहे. भाजपा जिल्हा उपाध्यक्ष प्रसन्ना ऊर्फ बाळू देसाई यांनी या प्रश्नाचा सातत्याने पाठपुरावा करत भाजपा प्रदेशाध्यक्ष रवींद्र चव्हाण यांच्याकडे निवेदनाद्वारे हा प्रश्न मांडला होता. चव्हाण यांनी या मागणीची तत्काळ दखल घेत संबंधित प्रशासनाकडे पाठपुरावा करून प्रश्न मार्गी लावला, त्यामुळे ही बससेवा पुन्हा सुरू होण्याचा मार्ग मोकळा झाला आहे.वेंगुर्ला आगारातून पूर्वी सुरू असलेली आरोंदा–परळ बससेवा काही कारणास्तव बंद करण्यात आली होती. परिणामी आरोंदा, शिरोडा, वेंगुर्ला तसेच परिसरातील प्रवाशांना मुंबई व बोरीवलीकडे जाण्यासाठी थेट एसटी सेवा उपलब्ध नव्हती. सार्वजनिक वाहतुकीचा हा महत्त्वाचा पर्याय बंद झाल्याने प्रवाशांना खासगी ट्रॅव्हल्स आणि इतर वाहनांवर अवलंबून राहावे लागत होते.वेंगुर्ला तालुक्यातील अनेक नागरिक नोकरी, व्यवसाय, शिक्षण तसेच अन्य कारणांसाठी मुंबई, बोरीवली व उपनगरांमध्ये वास्तव्यास आहेत. गणेशोत्सव, उन्हाळी सुट्टी तसेच विविध सणांच्या काळात हे चाकरमानी मोठ्या संख्येने आपल्या गावी येतात. मात्र थेट एसटी सेवा बंद असल्याने त्यांना प्रवासासाठी खासगी वाहनांचा आधार घ्यावा लागत होता.या मार्गावर दररोज ८ ते ९ खासगी गाड्या धावत असतानाही एसटीची थेट फेरी उपलब्ध नव्हती. त्यामुळे सर्वसामान्य प्रवाशांना तुलनेने जादा भाडे मोजावे लागत होते. तसेच एसटी महामंडळाच्या विविध सवलतींचा लाभ घेणाऱ्या ज्येष्ठ नागरिक, विद्यार्थी आणि अन्य पात्र प्रवाशांनाही या सेवेअभावी अडचणी येत होत्या.प्रवाशांची ही अडचण लक्षात घेऊन भाजपा जिल्हा उपाध्यक्ष प्रसन्ना ऊर्फ बाळू देसाई यांनी पुढाकार घेतला. त्यांनी शिरोडा–बोरीवली एसटी बससेवा पुन्हा सुरू करण्याबाबतचे निवेदन भाजपा प्रदेशाध्यक्ष रवींद्र चव्हाण यांच्याकडे सादर केले आणि सदर प्रश्न त्यांच्या निदर्शनास आणून दिला.गणेशोत्सव अवघ्या काही दिवसांवर आलेला असताना मुंबईतील चाकरमान्यांना गावी येण्यासाठी थेट आणि परवडणारी एसटी सेवा उपलब्ध होणे आवश्यक असल्याचे निवेदनातून स्पष्ट करण्यात आले. प्रवाशांची गैरसोय, खासगी वाहतुकीवरील वाढते अवलंबित्व आणि एसटी सेवेची असलेली गरज याकडे विशेष लक्ष वेधण्यात आले.या निवेदनाची रवींद्र चव्हाण यांनी तत्काळ दखल घेतली आणि संबंधित एसटी प्रशासनाशी संपर्क साधून बससेवा पूर्ववत करण्यासाठी आवश्यक कार्यवाही करण्याच्या सूचना दिल्या. त्यामुळे अल्पावधीतच या मागणीला सकारात्मक प्रतिसाद मिळाला असून बसफेरी सुरू करण्याचा निर्णय घेण्यात आला आहे.या प्रश्नाच्या सोडवणुकीसाठी एसटी कर्मचारी संघटनेच्या पदाधिकाऱ्यांनीही महत्त्वाची भूमिका बजावली. सेवा शक्ती संघर्ष एसटी कर्मचारी संघ सिंधुदुर्ग विभाग अध्यक्ष संदेश सावंत, भाजपा जिल्हा उपाध्यक्ष तथा सेवा शक्ती संघर्ष एसटी कर्मचारी संघ वेंगुर्ला आगार अध्यक्ष प्रसन्ना देसाई, भाजपा जिल्हा कामगार मोर्चा जिल्हाध्यक्ष अशोक राणे, विभागीय उपाध्यक्ष नीलेश तेंडुलकर आणि विभागीय सचिव भरत चव्हाण यांनी एसटी विभाग नियंत्रकांशी प्रत्यक्ष चर्चा करून प्रवाशांच्या समस्या मांडल्या.गणेशोत्सवाच्या काळात मुंबईहून कोकणात येणाऱ्या प्रवाशांची मोठी संख्या लक्षात घेऊन शिरोडा–बोरीवली फेरी सुरू करण्याची आवश्यकता त्यांनी प्रशासनाच्या निदर्शनास आणून दिली. या सातत्यपूर्ण प्रयत्नांनंतर एसटी प्रशासनाने बसफेरी सुरू करण्यास मान्यता दिली.

बससेवेचे वेळापत्रक
शिरोडा–बोरीवली :
७ सप्टेंबर २०२६ पासून
सायंकाळी ५ वाजता शिरोडा येथून प्रस्थान
बोरीवली–शिरोडा :
८ सप्टेंबर २०२६ पासून सायंकाळी ७ वाजता
बोरीवली येथून प्रस्थान

    गणेशोत्सवासाठी मुंबई व उपनगरांमधून मोठ्या संख्येने चाकरमानी कोकणात येतात. त्यामुळे ऐन गणेशोत्सवाच्या पार्श्वभूमीवर सुरू होणारी ही बससेवा चाकरमान्यांसाठी मोठी सोय ठरणार आहे. खासगी ट्रॅव्हल्सच्या वाढत्या भाड्यामुळे होणारा आर्थिक भार कमी होण्यास मदत होणार असून, सुरक्षित, नियमित आणि परवडणाऱ्या एसटी प्रवासाचा पर्याय प्रवाशांना उपलब्ध होणार आहे.तसेच एसटी महामंडळाच्या नियमानुसार उपलब्ध असलेल्या विविध सवलतींचा लाभ पात्र प्रवाशांना घेता येणार असल्याने ज्येष्ठ नागरिक, विद्यार्थी आणि सर्वसामान्य प्रवाशांसाठी ही सेवा अधिक उपयुक्त ठरणार आहे.शिरोडा, आरोंदा, वेंगुर्ला आणि परिसरातील नागरिकांसाठी मुंबईशी थेट सार्वजनिक वाहतुकीचा दुवा पुन्हा उपलब्ध होत असल्याने या निर्णयाचे स्वागत होत आहे. गणेशोत्सवाच्या तोंडावर एसटी सेवा पूर्ववत होणे ही चाकरमान्यांसाठी एकप्रकारे गणेशोत्सवाची भेटच ठरली आहे.या बससेवेसाठी पुढाकार घेऊन प्रश्न मांडणारे भाजपा जिल्हा उपाध्यक्ष प्रसन्ना ऊर्फ बाळू देसाई, प्रश्नाची तत्काळ दखल घेणारे भाजपा प्रदेशाध्यक्ष रवींद्र चव्हाण, तसेच एसटी प्रशासन व कर्मचारी संघटनेच्या पदाधिकाऱ्यांचे प्रवाशांकडून आभार व्यक्त करण्यात येत आहेत. आगामी काळातही ही बससेवा नियमितपणे सुरू राहावी, अशी अपेक्षा प्रवाशांकडून व्यक्त होत आहे.