बॉलिवूडचे सुप्रसिद्ध अभिनेते आणि विनोदी कलाकार सतीश शाह यांचे दुःखद निधन

मुंबई

    बॉलिवूडचे सुप्रसिद्ध अभिनेते आणि विनोदी कलाकार सतीश शाह यांचे मुंबईतील हिंदुजा रुग्णालयात दुःखद निधन झाले. ते ७४ वर्षांचे होते. त्यांच्या निधनाने हिंदी चित्रपट आणि दूरचित्रवाणी सृष्टीवर शोककळा पसरली आहे. मागील काही काळापासून शाह मूत्रपिंडाच्या विकाराने त्रस्त होते. त्यांच्यावर नुकतेच मूत्रपिंड प्रत्यारोपण शस्त्रक्रियाही करण्यात आली होती. मात्र, उपचारादरम्यान त्यांची प्राणज्योत मालवली.सतीश शाह यांनी चित्रपट आणि दूरचित्रवाणी अशा दोन्ही माध्यमांत आपल्या अष्टपैलू अभिनयाने प्रेक्षकांच्या मनात स्थान निर्माण केले होते. 'साराभाई व्हर्सेस साराभाई' या गाजलेल्या मालिकेतील त्यांची साकारलेली 'इंद्रवदन साराभाई' भूमिका विशेष गाजली होती. या भूमिकेमुळे ते घराघरात पोहोचले. याशिवाय, 'जाने भी दो यारो' (Jaane Bhi Do Yaaro) या कल्ट क्लासिक चित्रपटातील त्यांच्या भूमिकेचे आजही कौतुक केले जाते.
      त्यांनी 'मैं हूं ना' (2004), 'कल हो ना हो' (2003), 'फना' (2006), आणि 'ओम शांती ओम' (2007) यांसारख्या अनेक लोकप्रिय आणि ब्लॉकबस्टर चित्रपटांमध्ये महत्त्वपूर्ण भूमिका साकारल्या. अभिनयासोबतच, २००८ मध्ये त्यांनी अभिनेत्री अर्चना पूरण सिंग यांच्यासोबत 'कॉमेडी सर्कस' या लोकप्रिय रिअॅलिटी शोमध्ये परीक्षक म्हणूनही काम केले. चित्रपट सृष्टीतील त्यांच्या महत्त्वपूर्ण योगदानाबद्दल २०१५ साली त्यांना फिल्म अँड टेलिव्हिजन इन्स्टिट्यूट ऑफ इंडिया (FTII) चे फेलो म्हणून सन्मानित करण्यात आले होते. त्यांच्या निधनाने कला क्षेत्राचे मोठे नुकसान झाले आहे.